A Tridicina e Sant’Antuoni

Quandu era e Sant’Antuoni si facia a tridicina

e a Chiesi e Santu Foca e cristiani era chjina,

era chjina e zitiedi, e giuvaniedi e vecchiariedi

chi pregavanu a Sant’Antuoni u nci mandanu cuosi biedi

cu ruosi e mani spampinati, e cu gigghji profumati

i giuvaniedi jienu a gara, u si puonnu maritara,

Avanti a statua e Sant’Antuoni, arrivavanu ‘ndinocchjiuni

e nci portavanu ruosi e fiuri, u nci manda nu buonu amuri.

U pregavanu ‘ndinocchjiati cu i dinocchjia scumbogghjati

pezza e uri avanti ataru, u nci manda nu buonu cotraru,

mo avanti a Sant’Antuoni non vannu chjiu i cotrari

c’amu u si trovanu u compagnu, vannu supa o cellulari

e pe chissu non hannu tiempu u fannu chjiu a tridicina

ca cu stu “diavulu” furgulijianu notta, jiuornu e matina,

ca ogni minutu su azziccati cu l’uocchi supa o “quatriciedu”

e vannu ‘ngiru cu u cerviedu, u si trovanu u cotrariedu.

Mo non c’è a tridicina, ca tutti i jiuorni è na catina

e de chjiu viecchi e cotrari, Antuoni nci a fannu cu cellulari,

ma stu nuovu Sant’Antuoni, non sempa facia grazii buoni

e ruppa viecchi matrimuoni, mustrandu randa mali aziuoni.

Stu “mungipiedu” cangiau i tiempi, chidi buoni i facia mali

e i matrimona e Sant’Antuoni, i ruppa tutti cu cellulari.

Statua di Sant'Antonio, Chiesa di San Foca, Francavilla Angitola.

---

Foca Fiumara