Ciucciu chi rida

Nu salutu, bona genta

non si paga, è senza nenta.

Ma è l'ura u dicimu

pana o pana, vinu o vinu.

Prima u vena u hinimundu,

e ni scupa 'ntundu 'ntundu.

Tu poeta e io scritturi

simu, e vieru prohessuri?

Chi ni serva u scrivimu

si i rieguli ne sapimu?

E pecchissu stu paisi

vaia hora pe fa a spisi

c'è cu dicia: duni... duni

ca su i sordi do comuni.

Pe nui tutti e kiù importanti

u tenimu a vurza e vanti.

Pekkì sini preoccupatu

si nto tiestu n'c'è u stuhatu?

E si vai arriedi e avanti

cuomu i zingari erranti.

Quandu u sula cala e notta

nc'ena ncunu arriedi a porta?

O girijia viali viali

cuomu u surici cu l'ali?

Cu manija i dinari

ava u tena i cunti pari.

Ava u pensa duva i menta

cu cerveju e cu a menta.

I dinari on su cumpietti

e non su mancu panietti

vannu spisi tutti quanti

e non p'amici canti canti.

Ena bena u cercamu

duva è nesciu Adamu

e de kidhu chi nc'è oja

n'ammucciamu lu pe noia.

Non scrivimu u ni predhiamu

chi i paluori u mu i pagamu

e si i libra su copiati

sugnu già scaramidhati.

Si a pensati cuomu a mia

non c'è miegghjiu compagnia

E finimu sta corrida

si no u ciucciu pura rida.